يا ترى اللي حصل ده كان مجرد احتفال بسيط؟ ولا رسالة سرية لكل عشاق الرعب؟ 


يوم 25 أبريل، Capcom احتفلت بوصول عدد لاعبي Resident Evil 4 إلى 10 مليون لاعب عالميًا. وبدل ما تكتفي بكلام عادي، قررت تبعت لنا تلميح ذكي جدًا في فيديو قصير نزل على السوشيال ميديا.

في الفيديو، ظهر Leon بيحتفل قدام لافتة خشبية ريفية مكتوب عليها "شكرا لك للعب". للوهلة الأولى شكلها عادي... لكن لو دققت شوية أو لفيت الصورة على جنب، هتلاحظ إن ألواح الخشب بتكوّن الرقم الروماني "IX"، اللي معناه 9.

ومش بس كدا .. لا دا كمان مسربين كبار زي Dusk Golem لاحظوا إن الشكل ده مش موجود داخل أحداث اللعبة نفسها، يعني Capcom ضافت التفصيلة دي مخصوص، وده معناه إنه مش مجرد مصادفة خالص، بل رسالة متعمدة لعشاق السلسلة.

كمان، مش لازم ننسى إن Capcom أكدت من شوية إن Koshi Nakanishi، مخرج Resident Evil 7، شغال حاليًا على لعبة جديدة من السلسلة. وده بيخلي كل التلميحات بتصب في اتجاه واحد: Resident Evil 9 قربت

التوقعات بتقول إن RE9 هتكمل بنفس أسلوب الرعب النفسي اللي رجع بقوة مع Resident Evil 7، بس مع تطويرات أوسع في طريقة اللعب والعالم المفتوح. فيه ناس كمان بتقول إن RE9 ممكن تقدم قصة جديدة كليًا أو ترجع شخصيات كلاسيكية زي Jill أو Chris.

لحد دلوقتي مفيش إعلان رسمي، لكن مع الحماس اللي Capcom بتبنيه خطوة خطوة، ممكن نتوقع إن الإعلان الرسمي للعبة يحصل في واحدة من الفعاليات الكبيرة الجاية زي Summer Game Fest أو Gamescom 2025.

على العموم، لو ده فعلاً بداية التشويق لـ Resident Evil 9، فإحنا قدام تجربة رعب ضخمة بتتحضر، خاصة مع النجاح الرهيب اللي حققته RE7 وRE4 Remake.

لو RE9 فعلاً قربت، إنت نفسك تشوف إيه؟ 

عودة شخصية أسطورية؟ مغامرة جديدة؟ ولا عايز رعب نفسي يكسر الأعصاب أكتر من الأول؟